Psa 16 | KYG | STEP | O Gotiyo, hu'na, nagaemo kagaefeke'mo, naha maegaiye, hu'na nehuva'mofe'mo yagaika natege'nao afa'a maino.

Psalms 16

Goti'a agae veka'amo alagepa huno ha maesiya gemae

1 O Gotiyo, hu'na, nagaemo kagaefeke'mo, naha maegaiye, hu'na nehuva'mofe'mo yagaika natege'nao afa'a maino. 2 Nagaemo Ala kava nefe'mo, Ala kava ne'nimo mai'nane, hu'na kaha nepauve. Kaha maesuvafe'mo alagepa kava'mo nosufa ma mopafi mai'naya apaote vaya'mo hapa maesuvafeke'mo alagepa kava'mo nehuve. Apakaemo hogote vaya'mo mai'nage'na apakaefeke'mo amuse hu'na ne'apatove. 4 Alu goti'apimo akame hisayafe'mo apayamukiki nehaya vaya'mogimo mago'e hu'a lusi kana ya'mo aligae. Nagaemo kola ofalini'apimo ali'na laki'na o'apami'na apaki'apimo o'aegauve. 5 Ala kava ne'mo hetama'nimo mai'neno ani'mo kapufati'mo ne'nova anikana huno mai'niye. Hetama'nile'mo alagepa huka yagaika ne'natane. 6 Kagaemo alagepa ya'age'mo alika fako huka nami'nana'mofe'mo amuse nehuve. He, alagepa ya'mo ago ali'nove. 7 Ala kava ne'mo'a alino api aino ne'nateyanage'na agi'ale'mo ali'na asaga hu'na ategauve. Hani'ilagamo nagupi mafa'nemo'a alino naya ne'male. 8 Nagaemo muki afina'mo Ala kava ne'mo ali'na naulagale'mo ne'atove. Lamaga nahaopale'mo ne'maiya'mofe'mo alagepa kateti'mo navaleli'a o'visage'na ali'ya'nimo o'atalegauve. 9 Ne'maiya'mofe'mo naipafi'mo namogaga ne'auve. Navayafati'mo namogaga ne'auve. Navayagunagu hu'na agava ne'mauvanageno nagufa'nimo alagepa huno hanesige'na mai'na falu huguve. 10 Kagaemo mani kavatefe'mo naune'name'nimo kanolufi'mo o'atalegane. Kagaemo, aote veka'nimo agufa'amo atalesugeno okasaligiye, huka hu'nane. 11 Kagaemo alagepa hu'na maige maige hu'na maisuva ka'mo alika nave ligane. Kaulagale'mo maisaya vaya'ai apaipafi'mo apamogaga aisaya kava'mo'a havai tegaiye. Lamaga kahaopale'mo maisaya vaya'mogimo muki afina'mo lusi kava hu'a apavai apavai huge huge huli u'a maigae.